關於餵奶 - 人奶？奶粉？🥛🥛🥛

世衛建議餵人奶至小孩2歲是最好的，如果唔可以，最少6個月也對嬰兒有益處。點有益法好多網頁都有分享我就唔補充啦。

＜純粹個人選擇，不喜勿插＞

關於餵人奶，在小b出生前都吸收左好多朋友的經驗，對我來說能餵就餵，不能也沒所謂，現在奶粉配方也有好多營養。朋友的經驗不外乎：乳頭受損、塞奶乳線炎、唔夠奶等等，而且媽媽如要餵哺母乳休息嚴重不足，情緒起伏會較大，丈夫也較辛苦。

一星期內經歷上奶、脹奶、退奶🥛🥛🥛

在小b出世後，我就患上了傷風不斷流鼻水食藥，收鼻水藥其實係好眼訓的，所以在醫院的第2-3天我只去了餵奶室4次，試埋身試左3次，開刀未咁快上奶，所以都係學下個姿勢。到第4日上左奶，姑娘教我按摩乳房同用手擠奶，第1次擠左10ml，第2朝出院前再擠多次，擠左1小時都係得10ml。

返到家，陪月姐姐教我用奶泵泵奶，一路泵佢一路同我按摩乳房，由第1次泵到15ml到第3日泵每次已經泵到50ml，其實愈泵愈多係開心的，但係每次泵奶我都覺得超級痛苦。後來發現優合The ONE真係比較大力，第一次用乳頭已經甩哂皮，用多幾次乳墊都有血印。所以3天後我同陪月講我要停泵奶了，因為乳頭真係負荷唔到。而且堅持泵令我情緒都好低落因為真係好痛好痛。

當我決定退奶後心情立即轉好了，但隨即面對脹奶的痛。要慢慢退奶，如果脹痛我就用手擠一點出來（不能清空），再來持續冷敷。我覺得冷敷超有效。我未算多奶所以冇食退奶食品，大概2-3日左右就差唔多冇再脹奶了。但乳房仍然甩緊皮，用左1星期以上復原，中間也是不斷塗抹羊脂膏。

乳墊上的血跡 😟

陪月都有買耶菜給我，但耶菜我一敷很快變暖，最後都係用呢個冷敷墊

別人都說用泵奶器係唔應該會痛成咁，我在想優合呢個牌子真的不適合我。如果當初買第2隻牌子，可能我遲d都會做到全人奶吧~但我沒有後悔，最少小b有飲到我的黃金初乳。

總括來說，人奶路真的不易行，佩服所有餵人奶的媽媽們呢！

第一次影大肚相 - 孕照分享

原本以為拍孕照會好似拍婚照咁累，結果過程比我想像中要順利！在做資料搜集時，會考慮化妝及服飾，最後揀選這一間２樣都付合要求，雖然價錢不是最便宜，但我確實喜愛他們的化妝及攝影風格，而且有多套服裝可供選擇唔使煩。

以下係未經修圖嘅相～

Double J 👱🏼‍♂️👩🏼是由攝影師 Jerman，化妝師 Jessica組成的夫妻檔組合。

佢地有兩款「孕婦寫真」package，我揀左呢款j.a.ck.timeless 孕婦寫真 HK$6,800  

• 化妝、攝影均由Double J 主理
• 包媽媽化妝髮型連拍攝時間共3小時 
• 超過100款精美孕婦服飾可供選擇
• 2至3個造型　（每個造型是指一個場景及1套服飾）
• 取回全部高清原相不另收費(無壓縮Jpg檔)，拍攝完畢即時取回。
• 精修相片18張（只會執皮膚/面型/身型）
• 精美Dvd一隻(jpg file)連碟面印刷 
• 與先生一齊拍攝不另收費  (服裝自備）
• 如先生需加化妝及髮型服務，另加＄350
• 如需另加家庭成員（父母或子女），每位收費＄350 (服裝自備）
• 星期六日及公眾假期另加$200
• 拍攝以孕婦個人照為主
• 早鳥優惠有折扣！

初生嬰兒及哺乳用品List連價錢 及用後感

嬰兒日常用品👶🏻🍭👕

衣服👚👕

• 內衣6件(短袖或連身內衣)
• 長身2用裝外衫6件
• 包被3張
• 大毛巾(洗澡) 2條
• 紗巾24條
• 手套 2對
• 睡袋

食用物品🍼🍼 

• 奶瓶6個 (4大2小) Pigeon x 2 Chu Chu x 4
• 蒸氣消毒機 (有風乾功能) 黃色小鴨 - 微電腦觸控式消毒烘乾鍋 灰色 (HK$880)
• 矽膠奶樽擦 AEON
• 奶鉗 黃色小鴨
• 嬰兒奶瓶洗潔精 SWIPE (HK$40)
• 3-4層奶粉盒 黃色小鴨不易漏三層奶粉罐 (HK$30)
• 暖奶器 Beaba milk second (HK$379)

用後感：chuchu在網上評價好好所以我一次過買左4個，Pigeon同chuchu個奶咀可以互換所以買2個。但小B用完後發現chuchu咀真係太難吸，雖然隨盒附送一枝針仔比我地開大個口，但新手爸媽唔會識點開大d，最後落樓下AEON買返Pigeon個咀。(其實醫院用NUK個咀都幾好用)

日用及清潔用品💦⚙ 

• 沐浴盆 shnuggle 嬰兒浴盆 英國品牌 (HK$288)
• 嬰兒洗髮沐浴露 Mustela (HK$70)
• 嬰兒棉花捧(粗和幼) 思詩樂 / 棉德寶 (HK$20)
• 嬰兒專用潤膚露 Mustela (HK$69)
• 棉花球 棉德寶 (HK$15)
• 棉花塊 思詩樂 (HK$34)
• 小盒2個 for 裝熟水換片及抹咀用
• 膠盆(洗污衣)
• 凡士林/patpat膏 Mustela (HK$46)
• 紅外線溫度計 萬寧 (HK$239)
• 嬰兒洗衣液 SWIPE (HK$54)
• 嬰兒磨指甲器 AGUARD: BABY NAIL-CARE SET (HK$260)
• 嬰兒消毒噴霧 SWIPE (HK$66)
• 嬰兒濕紙巾 順順兒頂級嬰兒濕紙巾 (HK$49)
• 即棄換片墊 (HK$70)
• 洗奶瓶盆 AEON

家品及外出用品

• 嬰兒床 ggumbi morning star (HK$1,328)
• 隔尿墊 韓國Prielle (HK$169)
• 嬰兒車 Babyzen Yoyo 6+ 灰篷黑架加嬰兒睡籃 (原價HK$6,100; Facebook HK$4,888) 
• 嬰兒椅 + 睡籃 Stokke Tripp Trapp Baby Set (HK$2,970)
• 嬰兒揹帶 韓國 i-angel Miracle 四合一雙肩腰凳揹帶 (1M - 36M) (HK$1,615)

媽媽坐月用具 

• 1.5升保暖壼 for 熱代茶 象印 (HK$329)
• 2升一個膠壼 for 凍代茶 AEON (HK$30)
• 10-15升摺疊膠桶 for 薑水沖涼洗頭用 淘寶
• 1升膠壼 for 薑水洗手 
• 頭髮乾洗劑 Saborino (HK$86)
• 哺乳睡衣 Sixty Eight
• 產後束腹帶 六甲村 (HK$298)

用後感：產後束腹帶仁安都有提供，但回家後我自己轉用六甲村，因為仁安個條要其人幫手戴，但六甲村可以自己戴，調鬆緊容易D!　頭髮乾洗劑我冇用，因為回家沖涼用薑水沖身舒服D!

餵奶用具

• 哺乳內衣 千色店 (HK$300-400 each)
• 泵奶器 優合電動奶泵 (HK$799) + 優合Collection Cup 24mm免提喇叭(HK$339)
• 免提泵奶胸圍 紐西蘭HAAKAA (HK$258)
• 儲奶袋 
• 乳墊 NUK (HK$49)
• 乳頭清潔棉 NUK (HK$78)
• 羊脂膏 medela 39g (HK$159)
• 冷熱敷兩用墊 Kaneson (HK$98) 

用後感：如果用優合一定要買埋免提胸圍同Collection cup，真係方便多。另外羊脂膏建議買多幾枝，因為我個乳頭損左要不斷厚揸羊脂膏。其實在懷孕後期塗抹軟化乳頭會更好。冷熱敷兩用墊也是必買的。另外開一篇分享下餵奶。

以上大部份用品都係HKTVMall購入，雖然價錢唔係最平但因為費時煩，買到做左vip後HK$280就可免費送貨，特別是坐月時可以上網再買野唔使落街真係好方便！

5日4夜仁安開刀生產記

一早預約了9月24日，babe renee 38週2天時剖腹生產。透過朋友介紹揀左霍詠儀醫生做我的婦產科醫生。

9月16號開始放產假，愈接近開刀日，宮縮的情況愈嚴重，個肚拿住拿住好唔舒服，成日都好怕突然穿羊水。終於都捱到9月23晚7點入院登記（因為我是24號早上8點開刀，所以早一個晚上入院做準備）。晚上去到醫院先登記，然後姑娘帶我到3樓的產房做簡介，講解過程，探熱、量血壓、抽血及用剃刀清理開刀位置的毛髮。跟住進入另一房間聽胎心跳，要聽大約半個小時。整個過程大約用左2個鐘，完成後終於可以回房間。

我地被安排左3樓的4人的標準房（入院記住同姑娘講想3樓，因為其他樓層都有產房但bb房係3樓），入房後我開始食我自己準備的晚餐，12點後就唔可以再食野了。執整齊啲物品，沖埋最後的涼就睡覺了，當然係緊張到不斷宮縮睡唔好啦。由於我中左b鏈，醫生穩陣起見都要同我打枝b鏈針，手術前3個鐘打，於是姑娘零晨未到5點就叫醒我起身，順手種豆係手背。咁多枝針入面我覺得打手背係最痛的。

接住我7點起身擦牙換手術袍，7點30分姑娘就推張床入我房要我訓上去，再推我去2樓的手術室。入到手術室先見麻醉科醫生講解麻醉過程及簽同意書，見埋霍醫生就被推入手術房。過床後打麻醉藥，姑娘同麻醉科醫生人幫我側睡及捲曲身體，膝頭掂下巴咁。打麻醉針唔覺得好痛。打完醫生幫我插尿喉，姑娘開始準備塊布遮住個肚，然後叫老公入來陪產。麻醉藥好快生效，醫生開始開刀我一啲感覺都冇，好似5分鐘後就感覺到麻醉科醫生同姑娘醫生一齊推個肚，推個bb出黎，但過程一啲都唔痛，好清醒，隔左一陣就聽到bb喊聲，老公剪臍帶後，姑娘清潔完bb就抱去比我地影相，也是我手術日最後一次見bb。

然後老公就跟bb出左手術房，叫左老公同bb影多啲相。醫生就繼續同我縫傷口。一心諗住自己對麻醉藥應該冇乜副作用時，突然覺得好頭暈同勁想嘔，同麻醉科醫生講，佢同我加藥，但我仍然好想嘔，感覺啲血沖哂上腦眼球就快爆咁，最後都乾嘔左啲口水出來，姑娘幫我抹咀。持續左可能都有十幾分鐘先好啲，手術亦做完了推返出去等，麻醉醫生一直跟住我睇我情況如何。出左手術室已經冇乜事了。最後推返上房間休息。返到房已經係9:30分。

接住6小時都唔可以食野，係床上麻醉藥未過下半身都郁唔到，但都有精神玩下玩電話睇下老公轉來的b相。姑娘隔一陣就黎同我量下血壓，清理下身啲惡露，雖然話開刀少啲惡露，第1日啲惡露都係超級多。好快就過左6個鐘麻醉藥都過左好多，腳指可以郁下，而且可以飲啲粥水（第1日都只可飲流質野），用電床的搖控幫自己上身坐起，傷口一點也不痛。第一日都有好多人來探我及bb。

第二日早上7:30見完醫生，醫生批准我食固體食物並可以下床了。等到老公9點來到，搵姑娘幫我除哂啲針同尿喉，由姑娘幫我帶束腹帶後協助下落床。落床一刻我完全冇頭暈及唔舒服，傷口有點扯住但接受到，超緩慢地行就得。食左個早餐後去廁所留小便。以為開刀既痛就這樣，誰知下午1點時開始超級痛，痛到行唔到路，我分唔到係子宮收縮定傷口嘅痛，痛左1個鐘又冇乜事了。結果整日來回餵奶房同房間我老公都用輪椅接送，其實個距離只有幾十米咋。叫左醫院的膳食套餐，好有胃口食哂成個餐。夜晚用醫院提供的薑水抹面擦牙就睡了。第二晚心情突然超級低落，心想唔通呢啲就係傳說中的產後抑鬱？好彩第二日又冇事了。

Bb每日都唔同樣,因為會收水

第三日起床已經行動自如！第3-4日基本上都係餵奶房來回，每日有6轉餵奶時間，去到姑娘會教我地點埋身餵bb，通常每邊埋完身10分鐘姑娘會比奶粉我餵，教埋我掃風。而爸爸每日只有1次15分鐘的親子時間，要在中午12點報名呢！回房每隔4個鐘食一轉止痛藥，隔8個鐘姑娘會幫我係肛門塞止痛藥，因為我真係超驚痛。第4天可以把bb出院的衣服交比姑娘。

多謝朋友來看我

最後一日出院，早上婦科及兒科醫生會再來（兒科醫生我在第1天已揀左梁卓華醫生）。之後會計就會準備帳單，由於我的2位醫生都好早來，9點前已經見完，未夠11點老公就可以去會計部找數，然後拿著invoice去接bb走了。出院前預約埋健康院，過2日帶小b去健康院檢查黃疸。