3個月開始日頭在公公家，夜晚返自己屋企同爸媽一齊訓大床。但4個月大開始每晚一定要咬奶咀先願意訓，而且半夜醒左會喊，晚晚同佢執奶咀。對於好難先訓得著嘅我真係快要崩潰。
偶爾見到吳雨霏個女搵左sleep trainer ，囡囡第二日就可自我安撫入睡，我都決心搵sleep trainer 同我解決呢個問題。結果當然係非常滿意，寶寶每晚8:30訓到第2朝8點，而我也決心報讀了一個外國嘅sleep consultation certification. (仲未畢業）😂
在不斷爬文嘅過程中，了解左好多bb訓得唔好嘅原因，想幫更多父母解決bb訓覺問題～
其實我寶寶訓唔好主要原因有兩個
第一：日頭小睡不足，以致成日過累，日頭攰得滯絕對會令bb夜醒好多次。
第二：唔識自我安撫入睡，其實每一個健康嘅寶寶都有呢項技能，但佢地比父母訓練到要搖睡、抱睡或者奶睡。睡眠訓練就係比機會寶寶自己學識安撫入睡，呢項技能學識左，佢地夜醒都會識自己訓返。
發現原來外國好多網站教人做sleep training ，香港嘅sleep trainer我只數到3個。但在媽媽群組卻成日發現好多寶寶都有夜醒大喊問題。
Q&A:
1. 幾多個月可以開始睡眠訓練？
一般4個月就可以開始，因為bb已經發展到有晝夜規律，理論上夜晚已經可以連續訓11-12小時。我就係4個半月開始同寶寶做睡眠訓練。
2. 睡眠訓練就係要比bb喊嗎？(外國叫喊到訓cry it out)
其實好多寶寶調整左生理時鐘，日間同夜晚作息有規律，放上床夠累又不會過累就會好易訓著，未必一定要進行cry it out. 不過我就有比bb cry it out.
3. Cry it out 要喊幾耐先訓練到自我安撫入睡
第一晚寶寶8:30放床喊左28分鐘就累到訓著；但隔左個幾鐘又醒再喊1個鐘，朝早6點再喊40分鐘訓著。第一日連埋小睡喊左3個鐘。第2日全日喊2個鐘，第三日已經冇乜喊了。要好穩定就用左兩個星期。但夜醒情況真係大大改善。除左有時佢日頭訓唔夠或者唔舒服外，佢基本每晚都一覺訓天光。
4. 如何讓bb早啲訓
好多bb都會11-12點先訓，但其實最理想嘅訓覺時間係6-8，當然我都只係set左8:30。寶寶夜訓主因應該係日頭訓得太多。4個月開始我寶寶日頭訓3個鐘左右，夜晚就訓11-12個鐘。（遲啲出post 講訓覺時間）另外訓前沖涼都會幫到bb釋放退黑素。
5. 如何調節日間時間表
每個月齡嘅寶寶都有一個範圍嘅清醒時間同睡眠時間，日間小睡同夜間睡眠時間參考下圖：
每個月齡或年齡的睡眠時數（我的寶寶到8個月才開始由3小睡轉2小睡）
6. 睡眠訓練或 Cry it out 會令bb沒有安全感嗎？
其實規律作息同埋睡前儀式都讓寶寶知道幾時飲奶、幾時訓覺、幾時起身，反而令bb更有安全感。而且安全感主要靠日間你同寶寶相處時建立。當然，我同寶寶頭幾日進行cry it out時，都感受到佢有啲唔開心，但適應左後就開心返，而且長遠對寶寶同父母都獲得足夠睡眠，寶寶嘅認知能力都會提升。
